Lista me kandidatët për Drejtor të Përgjithshëm të Gardës së Republikës

Në vijim të thirrjes për aplikim për pozicionin e Drejtorit të Përgjithshëm të Gardës së Republikës, aplikimet e përcjella për këtë shpallje, sipas rendit alfabetik janë:

• Arian Sopiqoti
• Denis Deliu
• Faik Basha
• Ilirjan Hasanaj
• Liman Hoxha
• Simon Zereci
• Vasil Çuni
• Zaje Osma

 

THIRRJE PËR APLIKIM PËR POZICIONIN E DREJTORIT TË PËRGJITHSHËM TË GARDËS SË REPUBLIKËS

Në mbështetje të pikës 4 të nenit 102 të Kushtetutës së Republikës së Shqipërisë, të pikës 1 të nenit 17 të ligjit nr. 33/2021 “Për Gardën e Republikës së Shqipërisë”, i ndryshuar, si dhe Udhëzimit të Ministrit të Brendshëm nr. 102, datë 5.6.2024, “Për përcaktimin e rregullave dhe procedurave për përzgjedhjen e kandidatit për Drejtor të Përgjithshëm të Gardës së Republikës”, Ministria e Punëve të Brendshme shpall thirrjen për aplikim për pozicionin e Drejtorit të Përgjithshëm të Gardës së Republikës.

KOMPETENCAT DHE PËRGJEGJËSITË E DREJTORIT TË PËRGJITHSHËM TË GARDËS SË REPUBLIKËS:

a) organizon, drejton dhe kontrollon veprimtarinë e Gardës;

b) menaxhon burimet njerëzore dhe asetet financiare të Gardës;

c) nxjerr akte administrative për veprimtarinë e Gardës bazuar në aktet ligjore dhe nënligjore;

ç) i propozon ministrit strukturën dhe organikën e Gardës;

d) përfaqëson Gardën në marrëdhënie me institucionet e tjera brenda dhe jashtë vendit;

dh) nënshkruan marrëveshje teknike dhe operacionale, sipas akteve ligjore dhe nënligjore në fuqi;

e) emëron dhe jep grada për personelin e Gardës së Republikës, me përjashtim të gradës Drejtues i Lartë;

ë) ushtron kompetenca të tjera të parashikuara me ligj dhe në akte nënligjore.

1. KRITERET QË DUHET TË PLOTËSOJË APLIKANTI:

Kritere të përgjithshme:

a) të ketë vetëm shtetësinë shqiptare;

b) të ketë zotësi të plotë për të vepruar;

c) të mos ketë marrë cilësinë e të pandehurit për kryerjen e një vepre penale, ose ndaj tij të mos jetë marrë ndonjë masë e sigurimit personal;

ç) të mos ketë konflikt interesi në ushtrimin e detyrës;

d) të mos jetë larguar nga puna më parë për shkaqe disiplinore dhe të mos ketë masë disiplinore në fuqi në momentin e aplikimit.

Kritere të posaçme:

dh) të ketë përvojë pune jo më pak se 10 vjet në fushën e rendit ose sigurisë;

e) të ketë përfunduar ciklin e dytë të arsimit të lartë në fushën e rendit ose sigurisë;

ë) të mos jetë i dënuar me vendim gjykate të formës së prerë për kryerjen e një vepre penale;

f) të jetë i pajisur me vërtetimin e besueshmërisë;

g) të jetë në gjendje të mirë shëndetësore dhe i aftë për të kryer detyrën.

DOKUMENTACIONI, MËNYRA, AFATI I DORËZIMIT DHE VLERËSIMI:

1. Kërkesë me shkrim për shprehje interesi drejtuar Ministrit të Punëve të Brendshme për pozicionin e Drejtorit të Përgjithshëm të Gardës së Republikës.
2. Aplikimi duhet të jetë i plotë në mënyrë që të merret në konsideratë. Vlerësimi bëhet mbi bazën e dokumenteve të dorëzuara.
3. Kërkesa me shkrim për shprehje interesi shoqërohet nga dokumentet e mëposhtme:

a) një jetëshkrim i përditësuar;

b) një platformë personale e qëllimeve dhe objektivave që aplikanti propozon të ndjekë (ky dokument duhet të jetë punë origjinale e aplikantit dhe nuk duhet të kalojë 20 faqe, në llojin e shkrimit Times New Roman, madhësia 12, me një njësi hapësirë mes rreshtave duke përfshirë çështjet si më poshtë):

➢ Vizioni, politikat dhe strategjitë në Gardën e Republikës gjatë mandatit;

➢ Si e vlerësoni situatën në Gardën e Republikës gjatë pesë viteve të fundit (kritikat janë të vlerësueshme);

➢ Listoni përparësitë kryesore tuajat si Drejtor i Përgjithshëm i Gardës së Republikës dhe arsyet e përzgjedhjes së tyre;

➢ Evidentoni mangësitë e Gardës së Republikës dhe adresimin e zgjidhjeve;

➢ Cilat janë sfidat e Drejtorit të Përgjithshëm të Gardës së Republikës gjatë mandatit;

➢ Aftësia drejtuese dhe lidershipi për të udhëhequr Gardën e Republikës gjatë periudhës së mandatit;

➢ Cili është misioni dhe vizioni juaj gjatë mandatit;

➢ Evidentoni vështirësitë e rolit tuaj, rreziqet dhe masat për kapërcimin e tyre;

➢ Aftësitë menaxheriale gjatë periudhës së mandatit;

➢ Me qëllim përmbushjen e misionit dhe vizionit tuaj në krye të Gardës së Republikës listoni pesë prioritetet kryesore dhe arsyen e përzgjedhjes;

➢ Vizioni për të menaxhuar burimet njerëzore në Gardën e Republikës;

➢ Të renditen hapat që do të ndërmerren gjatë mandatit të Drejtorit të Përgjithshëm të Gardës së Republikës për të përmbushur objektivat kryesorë

➢ Hapat që do të ndërmerren gjatë dy viteve të para;

➢ Hapat që do të ndërmerren gjatë dyvjeçarit të dytë;

➢ Hapat që do të ndërmerren deri në mbarimin e mandatit;

➢ Përvoja praktike në çështjet e rendit ose sigurisë;

➢ Evidento përvojën e deritanishme;

➢ Hapat të cilët do të ndërmerren për të rritur nivelin e besueshmërisë së publikut institucionin e Gardës së Republikës;

c) vetëdeklarim sipas ligjit nr. 138/2015 “Për garantimin e integritetit të personave të zgjedhur, emëruar ose që marrin funksione publike”;

ç) dëshmi të gjendjes gjyqësore lëshuar nga organi kompetent shtetëror, e lëshuar jo më vonë se tre muaj nga data e paraqitjes së shprehjes së interesit;

d) vërtetimin/dokumentacionin e përshtatshëm që provon përvojën e punës për pozicionin për të cilin konkurron;

dh) rezultatet e vlerësimit profesional dhe etik në punët që ka bërë në të shkuarën, nëse ka, apo rezultatet e arritura gjatë përvojave të tyre të punës, që lidhen me ushtrimin e funksioneve në fushën e rendit dhe sigurisë;

e) rezultatet e arritura gjatë studimeve të larta dhe në trajnime dhe kurse të certifikuara, brenda dhe jashtë vendit;

ë) rezultatet e arritura gjatë studimeve pasuniversitare në fushën e rendit ose sigurisë;

f) kopje të noterizuara të dëshmive të gjuhëve të huaja;

g) kopje të noterizuara të gradës shkencore ose titujve akademikë, nëse ka;

gj) kopje të vërtetimit të besueshmërisë, të marrë nga komisariati përkatës, e lëshuar jo më vonë se 3 muaj nga data e paraqitjes së shprehjes së interesit;

h) dokumentin shëndetësor që dëshmon aftësinë për punë, e lëshuar jo më vonë se 3 muaj nga data e paraqitjes së shprehjes së interesit;

i) vetëdeklarim që ka vetëm shtetësinë shqiptare;

j) vetëdeklarim që nuk është në konflikt interesi në ushtrimin e detyrës;

k) vetëdeklarim që nuk është larguar nga puna më parë për shkaqe disiplinore dhe që nuk ka masë disiplinore në fuqi në momentin e aplikimit.

l) çdo dokument tjetër shtesë (në rast se ka) që provon:

• studimet dhe trajnimet afatgjata të kryera jashtë vendit jo më pak se dy javë në fushën e rendit ose sigurisë ose aftësive menaxheriale;
• punime akademike, studime shkencore, shkrime e ligjërata profesionale, botime, pjesëmarrje në aktivitete shkencore (përveç atyre që kanë shërbyer për fitimin e gradës shkencore), pjesëmarrje në procesin e hartimit ose të konsultimit të legjislacionit e çdo angazhim tjetër profesional i aplikantit gjatë 5 viteve të fundit në fushën e rendit ose sigurisë.

Dokumentet duhet të dorëzohen brenda datës 30.12.2025 në adresën:

• Ministria e Punëve të Brendshme, Blv. “Dëshmorët e Kombit”, Nd. 1, 1001, Tiranë,
• Adresa elektronike: Ministria.Brendshme@mb.gov.al

Shprehja e interesit dhe të gjitha dokumentet e kërkuara duhet të dorëzohen në adresën postare ose në adresën elektronike.

 

VLERËSIMI:

Brenda 45 ditëve nga përfundimi i afatit të dorëzimit të shprehjeve të interesit, Komisioni i Posaçëm (në vijim Komisioni) kryen vlerësimin paraprak, me qëllim verifikimin e plotësimit të kritereve të përgjithshme dhe të posaçme. Komisioni kryen vlerësimin sipas përcaktimeve në nenet 2, 4-17, të Udhëzimit të Ministrit të Brendshëm nr. 102, datë 5.6.2024.

Në përfundim të vlerësimit paraprak, Komisioni harton listën e kandidatëve që plotësojnë kriteret e kërkuara dhe të aplikantëve që nuk i plotësojnë këto kushte bazuar në dokumentacionin e paraqitur nga aplikanti dhe dokumentacionin shtesë të mbledhur nga Komisioni.

Komisioni merr vendim për përjashtimin e aplikantëve që nuk plotësojnë kushtet ligjore dhe i njofton me shkrim aplikantët e përjashtuar, në mënyrë të posaçme dhe të arsyetuar për shkaqet e përjashtimit.

Komisioni organizon seancë dëgjimore me kandidatët dhe i njofton ata të paktën 10 ditë para seancës dëgjimore. Anëtarët e Komisionit i drejtojnë pyetje kandidatit në përputhje me kriteret e vlerësimit sipas udhëzimit të Ministrit të Brendshëm nr. 102, datë 5.6.2024.

Anëtarët e Komisionit vlerësojnë të gjithë informacionin e vënë në dispozicion prej kandidatëve, dokumentacionin e mbledhur dhe informacionin e marrë gjatë seancës dëgjimore dhe i dorëzojnë Ministrit renditjen e kandidatëve, së bashku me vlerësimet me shkrim, për secilin kandidat, në përputhje udhëzimin e Ministrit të Brendshëm nr. 102, datë 5.6.2024.