Projektligji “Për disa shtesa dhe ndryshime në ligjin nr. 8952, datë 10.10.2002, “Për letërnjoftimin elektronik të shtetasve shqiptarë”, të ndryshuar, synon krijimin e mundësisë për pajisjen me letërnjoftim digjital (e-letërnjoftim) për gjithë shtetasit e pajisur me letërnjoftim elektronik. Kjo përmbush agjendën politike të qeverisë shqiptare, në kuadër të digjitalizimit, modernizimit të sistemeve elektronike, si dhe zbatimin e skemave të sigurta të shërbimeve e-ID.
Pajisja me letërnjoftim digjital (e-letërnjoftim) përmirëson dhe standardizon mënyrat e identifikimit të qytetarëve në ambientin digjital.
Ndër risitë e nismës janë:
- E-ID lejon qytetarët të identifikohen dhe të verifikojnë identitetin e tyre në mënyrë të sigurtë dhe të shpejtë në internet, duke u lehtësuar proceset administrative;
- Redukton nevojën për të pritur në radhë ose për të vizituar personalisht zyrat e administratës publike;
- Mundëson përfshirjen e grupeve që më parë kanë pasur akses të kufizuar në shërbimet publike dhe private për shkak të barrierave fizike ose gjeografike;
- Ndihmon në përfshirjen e personave me aftësi të kufizuara duke ofruar shërbime të aksesueshme në distancë;
- Përmirëson sigurinë e të dhënave personale, duke ofruar metoda më të sigurta të autentifikimit dhe mbrojtjes së informacionit personal;
- Ul ndjeshëm kohën dhe kostot e lidhura me procedurat administrative.
Miratimi i këtij projektligji standardizon identifikimin e qytetarëve në nivel evropian dhe implementon një identitet digjital të përbashkët, i cili mund të lehtësojë komunikimin dhe bashkëpunimin me institucionet dhe bizneset evropiane. Gjithashtu, një identitet digjital i përbashkët ndihmon autoritetet ligjzbatuese në luftën kundër krimit të organizuar dhe mashtrimeve në intemet, duke rritur sigurinë dhe besueshmërinë e transaksioneve online.
Ministria e Brendshme, së bashku me IdentiTek, kompania që prodhon dhe shpërndan dokumente biometrike për shtetasit shqiptarë dhe/ose shtetasve të huaj me banim të përkohshëm apo të përhershëm në Republikën e Shqipërisë, sjellin këtë propozim në përputhje me kuadrin rregullator në vend.
