Në konferencën ku mori pjesë Kryeministri Rama, ministrat dhe përfaqësues të Këshillit të Europës, Ministri i Brendshëm Ervin Hoxha bëri një ekspoze të gjerë rreth masave të marra dhe luftës kundër korrupsionit në strukturat e Policisë së Shtetit. Duke iu referuar raportit të GRECO, Ministri Hoxha vuri në dukje faktin që Policia e Shtetit ka përmbushur dhe plotësuar të gjitha rekomandimet e dhëna në këtë drejtim. Hoxha tha se angazhimet e marra shpien drejt forcimit dhe “modernizimit të mëtejshëm të Policisë së Shtetit”. Ne besojmë, – tha Ministri, – se vetëm përmes këtyre proceseve, ky institucion mund të përsoset e t’i përgjigjet me profesionalizëm dhe eficencë, çdo sfide të sigurisë dhe rendit publik.

Më poshtë fjala e plotë e mbajtur gjatë konferencës:

I nderuar z. Kryeministër,

Të nderuar Ambasadorë,

I nderuar z. Esposito,

Të dashur partnerë dhe kolegë,

Jam shumë krenar të ndaj sot me ju disa prej arritjeve konkrete të Shqipërisë në luftën kundër korrupsionit dhe përmbushjen e standardeve të Këshillit të Evropës. Si Ministër i Brendshëm, do të fokusohem në punën e bërë sa i përket luftës dhe parandalimit të korrupsionit në strukturat e Policisë së Shtetit.

Ky raund vlerësimi i GRECO, – (i përmbyllur me sukses për vendin tonë, me 24 rekomandime, gjysma e të cilëve janë fokusuar në vlerësimin e imtësishëm të performancës së Policisë së Shtetit), – është dëshmia më e qartë e një angazhimi tejet serioz të institucioneve tona të sigurisë, përkatësisht, Policisë së Shtetit. Përmbushja e rekomandimeve është rezultati faktik i gjithë përpjekjeve, për të forcuar çdo hallkë integriteti në Policinë e Shtetit, agjencinë më të madhe ligjzbatuese në vend.

Më lejoni që të bëj një përmbledhje koncize, të disa prej akteve që kemi ndërmarrë në drejtim të luftës dhe masave për parandalimin e korrupsionit.

Së pari, në përmbushje dhe zbatim të rekomandimeve të GRECO-s, në prioritetet vjetore të Ministrisë së Brendshme dhe institucioneve të varësisë, janë planifikuar masa dhe aktivitete konkrete, që përfshijnë ndryshime strukturore, hartim aktesh ligjore e nënligjore, inicim procesesh të reja pune në institucion, si dhe trajnime të vazhdueshme.

Specifikisht dua të përmend këtu ligjin “Për Policinë e Shtetit”, miratuar në korrik 2024, i cili është i bazuar në modelet më të mirat të njësive homologe, duke adresuar plotësisht çdo rekomandim të GRECO. I gjithë ky proces është zhvilluar me asistencën më të mirë të BE-së dhe Këshillit të Evropës. Gjej rastin këtu t’i falënderoj për mbështetjen proaktive dhe për mënyrën shumë profesionale, me të cilën na bashkë-shoqërojnë në rrugëtimin e forcimit të sigurisë.

Gjithashtu dua të vë në dukje faktin se plotësimi i rekomandimeve të GRECO për Policinë e Shtetit, është bërë i mundur në sajë të një pune të palodhur dhe në bashkëpunim të ngushtë edhe me Ministrin e Shtetit për Administratën Publike dhe Antikorrupsionin, që ndjek procesin e plotësimit të rekomandimeve. Këto rekomandime janë detajuar më pas edhe në Rregulloren e miratuar të Policisë së Shtetit.

Përtej aspektit ligjor, ajo që ka rëndësi është fakti se ato tashmë janë shndërruar në pjesë integrale e punës së përditshme të kësaj organizate.

Këto angazhime përbëjnë një aspekt thelbësor drejt modernizimit të mëtejshëm të Policisë së Shtetit. Ne besojmë se vetëm përmes këtyre proceseve, ky institucion mund të përsoset e t’i përgjigjet me profesionalizëm dhe eficencë, çdo sfide të sigurisë dhe rendit publik.

Së dyti, Ministria e Brendshme dhe institucionet e varësisë kanë miratuar dhe zbatuar Planet e Integritetit për periudhën 2022 – 2024. Në përfundim të periudhës 3-vjeçare, Ministria e Brendshme ka nisur punën për hartimin e Planit të ri të Integritetit dhe Planit të Veprimit për periudhën 2025 – 2028. Dokumenti i ri do të shërbejë si një udhërrëfyes për forcimin e transparencës, llogaridhënies dhe standardeve etike në strukturat e Ministrisë së Brendshme, në luftën kundër korrupsionit dhe promovimin e integritetit institucional.

Së treti, me mbështetjen e projektit EU4LEA është hartuar një analizë e kuadrit ligjor për të kufizuar rreziqet e korrupsionit dhe konfliktit të interesit në lidhje me donacionet dhe sponsorizimet për Policinë e Shtetit. Gjetjet e kësaj analize janë reflektuar në ligjin e ri “Për Policinë e Shtetit”, që ndalon pranimin e donacioneve nga subjekte të ndryshme. Përjashtime janë vetëm në rast kur ato vijnë nga organizma apo përfaqësues të komunitetit të biznesit dhe vetëm pas shqyrtimit nga struktura përgjegjëse dhe miratimit nga Drejtori i Përgjithshëm i Policisë së Shtetit.

Së katërti, Ministria e Brendshme dhe Policia e Shtetit kanë bashkëpunuar ngushtësisht me Këshillin e Europës për adresimin e rekomandimit të GRECO-s për përmirësimin e politikave për ofrimin e shërbimeve shtesë nga Policia e Shtetit duke marrë parasysh rreziqet për korrupsion dhe konfliktin e interesit.

Policia e Shtetit ka ndërmarrë një hap të rëndësishëm në forcimin e etikës dhe integritetit profesional me miratimin e Manualit të Etikës Policore, që përmban udhëzime të qarta mbi parimet e etikës, integritetin, konfliktin e interesit dhe vendimmarrjen etike, duke përfshirë shembuj konkretë për situata të ndryshme.

Një tjetër arritje e rëndësishme është krijimi i Këshillave Konfidencialë të Policisë së Shtetit, të cilat do të ofrojnë këshillim konfidencial për punonjësit mbi etikën, integritetin, konfliktin e interesit dhe procedurat disiplinore.

Në zbatim të ligjit të ri, përzgjedhja e drejtuesve të lartë të Policisë së Shtetit është realizuar sipas kritereve ligjore të përcaktuara, përmes një konkurrimi transparent, ku shpalljet dhe rezultatet janë bërë publike. Rezultatet e fundit të konkurseve treguan interes të shtuar dhe rritje të besueshmërisë për sa i përket garantimit për procese konkurrimi të drejta dhe bazuar në meritokraci, ku konkretisht për 12 pozicione për drejtorë vendorë konkurruan 48 kandidatë, si dhe për 47 pozicione për shefa të Komisariateve konkurruan mbi 300 kandidatë nga Policia e Shtetit.

Së fundi, në zbatim rekomandimit të GRECO-s edhe punonjësit e ‘Illyrian Guard’ u nënshtrohen të njëjtave masa ligjore dhe rregullatore si punonjësit e Policisë së Shtetit, në procedurat e prokurimit publik dhe të rekrutimit të personelit sipas kuadrit ligjor në fuqi.

Të nderuar pjesëmarrës,

Këto arritje janë një dëshmi e angazhimit të palëkundur në nivel politik-bërjeje nga i gjithë aparati i Ministrisë së Brendshme si dhe, – në nivel zbatimi – nga Policia e Shtetit. Me përkushtimin dhe kontributin e dhënë çdo ditë, bënë të mundur jo vetëm një përmirësim teknik të çdo qelize të Policisë së Shtetit, por edhe një rritje të qartësishme të besimit të qytetarëve ndaj institucioneve tona.

Ambicia jonë është që të jemi pjesë e një procesi përsosjeje dhe vetë-përmirësimi të vazhdueshëm. Prandaj vlerësime si ky i GRECO janë më se të mirëpritura, jo vetëm për të evidentuar rrugën e gjatë që kemi bërë, por dhe për të na mbajtur me këmbë në tokë për çfarë ende mbetet, për të garantuar standardet europiane të integritetit të të gjithë punonjësve të sigurisë dhe për një Shqipëri më të sigurt, me standarde. Faleminderit!