Nuk e fsheh dot habinë e kërkesës për këtë interpelancë, a thua se Shqipëria ndodhet në ndonjë krizë migratore apo ka humbur kontrollin mbi kufijtë e saj. Përkundrazi, të gjitha të dhënat tregojnë se vendi ynë po menaxhon mjaft mirë flukset migratore, duke forcuar vit pas viti kapacitetet e kontrollit kufitar, bashkëpunimin ndërkombëtar dhe goditjen e rrjeteve kriminale. Megjithatë në respekt të deputetëve të opozitës dhe në përmbushjen e detyrimit kushtetues që kam, jam këtu për t’ju përgjigjur shqetësimit që ju keni ngritur.

Të nderuar deputetë,

migracioni është një çështje që lidhet drejtpërdrejt me sigurinë kombëtare, kontrollin e territorit, luftën kundër krimit të organizuar dhe detyrimet që Shqipëria ka marrë në rrugën e saj drejt Bashkimit Europian. Fakt është se nuk kemi një krizë migratore dhe se vendi ynë po kontribuon aktivisht në sigurinë e kufijve të Evropës. Në vitin 2024 janë evidentuar 1,540 migrantë të parregullt, ndërsa në vitin 2025 janë evidentuar 1,926. Po, kemi një rritje prej rreth 25%, por kjo duhet parë në perspektivë. Në vitin 2022 u evidentuan mbi 8 mijë migrantë të parregullt, ndërsa në vitin 2023 mbi 6 mijë. Pra, niveli aktual mbetet shumë më i ulët se periudhat kur Ballkani Perëndimor përballej me presione të forta migratore. Rritja e evidentuar gjatë vitit 2025 nuk duhet lexuar jashtë kontekstit të zhvillimeve rajonale dhe të dhënave afatgjata. Në fakt, Shqipëria sot përballet me nivele dukshëm më të ulëta të migracionit të parregullt krahasuar me vitet e flukseve intensive.

Një fenomen i ri i konstatuar nga fundi i vitit 2025 ka qenë hyrja e paligjshme e shtetasve nga Bangladeshi, Nepali dhe Sri Lanka përmes kufirit me Malin e Zi, pasi më herët ishin pajisur me viza ose leje qëndrimi në Serbi. Autoritetet shqiptare kanë vepruar menjëherë për identifikimin dhe verifikimin e tyre, duke zbatuar procedurat e ripranimit ose kthimit vullnetar në vendet e origjinës. Po ashtu, të dhënat zyrtare tregojnë se numri i azilkërkuesve në Shqipëri ka rënë nga 261 në vitin 2023 në vetëm 104 gjatë vitit 2024, ndërsa shumica e tyre vijnë nga Afganistani, Siria dhe Pakistani. Këto tregues, së bashku me intervistat e zhvilluara me migrantët e ndaluar, konfirmojnë se Shqipëria nuk perceptohet si destinacion përfundimtar, por kryesisht si një vend tranziti drejt vendeve të Bashkimit Europian, si Gjermania, Austria, Suedia dhe Holanda. Kjo është arsyeja pse sfida jonë kryesore mbetet menaxhimi efektiv i flukseve dhe goditja e rrjeteve kriminale që përpiqen të shfrytëzojnë këto lëvizje migratore.

Një nga pyetjet e ngritura në kërkesën tuaj, lidhet me trafikimin e qenieve njerëzore dhe rrjetet kriminale që operojnë në këtë fushë. Përgjigjja jonë është e qartë; këto rrjete ekzistojnë, por ato po goditen me një intensitet në rritje dhe këtu shifrat flasin qartë. Gjatë vitit 2025 janë finalizuar 14 operacione policore kombëtare kundër trafikimit të personave, si dhe një operacion i përbashkët ndërkombëtar në kuadër të Europol-it, me pjesëmarrjen e Policisë Shqiptare, Policisë Kolumbiane dhe Policisë Kroate, nën koordinimin e Eurojust. Janë ndjekur me metoda speciale hetimi 26 raste të trafikimit të personave dhe janë proceduar dhjetëra autorë të përfshirë në këtë veprimtari kriminale.

Këto nuk janë thjesht statistika. Janë tregues të kapaciteteve në rritje të shtetit për të identifikuar, hetuar dhe çmontuar rrjete kriminale që operojnë përtej kufijve kombëtarë.

Po ashtu, gjatë vitit 2025 janë evidentuar 44 raste të ndihmës për kalim të paligjshëm të kufirit, ku është tentuar kontrabandimi i 121 personave.  Kjo tregon se strukturat tona jo vetëm po monitorojnë fenomenin, por po e godasin atë në kohë reale.

Për shqetësimin tuaj që lidhet me forcimin e kufijve tokësorë dhe detarë, dua të them se Shqipëria ka bërë investimin më të madh në historinë e Policisë Kufitare. Që nga viti 2019, numri i efektivëve të Policisë Kufitare është rritur me mbi 31%, duke arritur në afro 2,300 punonjës. Janë shtuar automjetet e patrullimit, sistemet e vrojtimit, kamerat inteligjente, radarët detarë, dronët me kapacitete termike dhe mjetet lundruese për kontrollin e kufirit blu. Vetëm përmes programeve të financuara nga Bashkimi Europian janë investuar miliona euro në teknologji, mjete lundruese, radarë dhe sisteme moderne monitorimi. Në janar të këtij viti është miratuar edhe Plani Kombëtar i Veprimit për Shengenin, ndërsa ligji i ri për kontrollin e kufirit shtetëror ka përafruar më tej Shqipërinë me standardet europiane. Por ndoshta dëshmia më e fortë e besimit europian ndaj institucioneve shqiptare është bashkëpunimi me FRONTEX. Shqipëria ishte vendi i parë jashtë Bashkimit Europian ku FRONTEX dislokoi oficerë operativë në terren.

Sot operacionet e përbashkëta shtrihen në kufirin me Greqinë, Malin e Zi, në portet kryesore dhe në kufirin detar. Rezultatet janë konkrete. Rreth 90% e migrantëve të parregullt identifikohen sot në zonat operative të mbuluara nga FRONTEX dhe Policia e Shtetit, ndërkohë që para fillimit të këtyre operacioneve identifikoheshin më pak se gjysma e tyre. Bashkëpunimi me FRONTEX, Europol, Eurojust, autoritetet britanike, gjermane dhe partnerët e tjerë europianë ka mundësuar jo vetëm kontroll më të fortë kufitar, por edhe goditjen e rrjeteve kriminale që veprojnë në kontrabandimin e migrantëve dhe trafikimin e qenieve njerëzore.

Shqipëria kamp tranziti për emigracionin ilegal? – Përgjigjja për këtë pyetje që ju shtroni, është e qartë dhe e prerë. JO! Shqipëria ka një plan kombëtar kontingjence të hartuar sipas metodologjisë së Bashkimit Europian, ka kapacitete pritëse të planifikuara, mekanizma identifikimi biometrik, procedura azili dhe struktura operacionale të gatshme për përballimin e flukseve të mundshme.

Vetë Bashkimi Europian ka vlerësuar pozitivisht Strategjinë Kombëtare për Migracionin 2024–2030, Planin e Kontingjencës dhe bashkëpunimin e Shqipërisë në fushën e kthimit dhe ripranimit. Prandaj, alarmet për humbje kontrolli apo për kthimin e Shqipërisë në një hapësirë të pakontrolluar migratore nuk mbështeten në fakte. Ata që përpiqen të ndërtojnë narrativa frike apo të paraqesin vendin tonë si një hallkë të dobët të sigurisë europiane, injorojnë faktet me dashje dhe rezultatet konkrete të institucioneve shqiptare.

Sot kufijtë e Shqipërisë monitorohen dhe mbrohen sipas standardeve më të avancuara europiane, në bashkëpunim të përditshëm me FRONTEX, Europol dhe partnerët tanë strategjikë. Migrantët e parregullt që evidentohen në territorin shqiptar identifikohen, regjistrohen, verifikohen dhe trajtohen sipas ligjit dhe standardeve ndërkombëtare.  Shqipëria nuk është një hapësirë ku krimi organizon korridore të lira kalimi; përkundrazi, është një shtet që po i mbyll këto korridore dita-ditës dhe po dëshmon se është një partner i besueshëm dhe serioz në mbrojtjen e kufijve të Europës.

Evropa na konsideron pjesë të zgjidhjes, jo të problemit

Partnerët tanë europian e konsiderojnë Shqipërinë si një vend që po ecën me vendosmëri drejt Bashkimit Europian. Shqipëria mbron kufijtë e vet dhe kontribuon aktivisht për kufijtë e Evropës. Territori i Republikës së Shqipërisë nuk është dhe nuk do të lejohet të bëhet strehë për organizatat kriminale ndërkombëtare që merren me trafikimin e qenieve njerëzore.  Ne do të vazhdojmë të investojmë në sigurinë kufitare, të forcojmë bashkëpunimin me partnerët tanë europianë dhe të godasim pa kompromis çdo rrjet kriminal që cenon sigurinë e qytetarëve dhe reputacionin e vendit. Shqipëria sot është më e përgatitur, më e pajisur dhe më e koordinuar se kurrë më parë për të përballuar sfidat e migracionit të parregullt dhe krimit ndërkufitar.

Sot Shqipëria nuk është më thjesht një vend që përfiton nga siguria kolektive e aleatëve të saj, por një vend që kontribuon realisht në sigurinë e Europës dhe të Aleancës së Atlantikut të Veriut.

Përmes angazhimit në NATO, bashkëpunimit të ngushtë me agjencitë europiane të sigurisë, pjesëmarrjes në operacione të përbashkëta kundër migracionit të paligjshëm, krimit të organizuar dhe trafikimit të qenieve njerëzore, vendi ynë po dëshmon se është një partner i besueshëm dhe një faktor stabiliteti në rajon. Kjo është Shqipëria që po ndërtojmë; një shtet që mbron kufijtë e vet, por që njëkohësisht kontribuon në mbrojtjen e kufijve të Europës; një vend që po afron standardet, institucionet dhe kapacitetet e tij me ato të Bashkimit Europian, me objektivin e qartë për t’u bërë anëtar me të drejta të plota brenda vitit 2030.

Siguria, sundimi i ligjit dhe lufta kundër krimit të organizuar nuk janë vetëm detyrime të procesit të integrimit, por prova konkrete se vendi ynë është gati të marrë përgjegjësi gjithnjë e më të mëdha në familjen euroatlantike. Faleminderit!