Romë - Lleshaj: Sfida e politikës, e shoqërisë, e autoriteteve është që raste si i Alvin Berishës të mos përsëriten më në shoqëritë tona - Ministria e Brendshme
Postuar më: 08/11/2019

Romë – Lleshaj: Sfida e politikës, e shoqërisë, e autoriteteve është që raste si i Alvin Berishës të mos përsëriten më në shoqëritë tona

Romë – Ministri Lleshaj, konferencë shtypi së bashku me autoritetet italiane VIDEO

Ministri i Brendshëm Sandër Lleshaj ka falënderuar të gjitha autoritetet shqiptare dhe të huaja, të përfshira në operacionin për nxjerrjen e djaloshit shqiptar Alvin Berisha nga kampi Al-Hol, i ish-militantëve të ISIS-it në Siri. Këto deklarata u bënë gjatë një konference shtypi të zhvilluar sot në Romë ku morën pjesë edhe Presidentët e Kryqit të Kuq italian dhe ndërkombëtar, Presidenti i Gjysmëhënës së Kuqe të Sirisë, kreu i Policisë italiane e zyrtarë të tjerë të lartë të përfshirë në këtë ngjarje. Lleshaj nënvizoi aspektet e rëndësishme të këtij operacioni, së pari atë politik, për të cilin u shpreh se “gjithë sfida e politikës, e shoqërisë, e autoriteteve është që raste si ky i Alvin Berishës të mos përsëriten më në shoqëritë tona dhe terrorizmi, ekstremizmi, radikalizmi, çdo formë e dhunës, të mos gjejë asnjë hapësirë në shoqërinë tonë europiane”. Ai vlerësoi bashkëpunimin e palëve në këtë proces duke e konsideruar si vendimtar për gjithë suksesin e arritur. “Ky ka qenë një operacion ku sikur edhe njëri nga aktorët të mos, ai nuk finalizohej me sukses”, nënvizoi Ministri në ndërhyrjen e tij.

Më poshtë fjala e plotë e ministrit Lleshaj:

Mirëmëngjes,

Në Shqipëri dëgjohet dhe flitet aq shumë italisht, sa që mendoj që ju meritoni sot të dëgjoni diçka shqip.

Së pari, më lejoni të falënderoj të gjithë të pranishmit, të falënderoj gjeneral Spinën për mundësinë e këtij takimi. Takohem për herë të dytë me gjeneral Spina në një situatë pozitive si kjo e sotmja.

Sot është një ditë e rëndësishme, e cila fillon me Alvin Berishën, i cili vërtet ka arritur që t’i largohet ferrit ku ka jetuar, ose ku ka humbur një pjesë të fëmijërisë së tij. Falë angazhimit të të gjithë këtyre aktorëve ai është rikthyer në botën që i përket.

Ka qenë një operacion jashtëzakonisht i ndërlikuar ku janë përfshirë disa përfshirë disa aspekte të rëndësishme.

Së pari, kemi një aspekt politik, të cilin unë duhet ta përmend se askush tjetër me sa shoh këtu, nuk mund ta përmendë. Operacioni ka marrë vëmendjen e të dy kryeministrave, kryeministrit Conte dhe kryeministrit Rama dhe është ndjekur nga afër nga të dy ata pas takimit që kanë zhvilluar në Romë. Pastaj ka pasur një dimension shumë të rëndësishëm diplomatik ku janë përfshirë ambasadat tona, ambasada e Shqipërisë, Konsullata e Shqipërisë në Bejrut, Ambasada e Italisë në Bejrut.

Ka pasur një aspekt shumë të rëndësishëm policor ku janë angazhuar në një bashkëpunim të jashtëzakonshëm dhe të shkëlqyer policitë e të dy vendeve tona.

Dhe së fundmi, por jo nga rëndësia, ka qenë aspekti humanitar ku janë angazhuar Kryqi i Kuq ndërkombëtar dhe Gjysmëhëna e Kuqe.

Unë nuk dua të hyj në detajet e operacionit për arsye se u përmendën nga gjeneral Spina dhe u përmendën edhe nga kolegët e tjerë të pranishëm në tryezë.

Unë dua vetëm, dhe për këtë punë kam ardhur sot në Romë, vetëm për të shprehur mirënjohjen dhe për të shprehur falënderimet e Qeverisë Shqiptare në adresë të të gjithë autoriteteve dhe aktorëve që u përfshinë në këtë operacion.

Së pari, për autoritet policore të Shqipërisë dhe të Italisë, për autoritetet e Kryqit të Kuq, pra për Presidentin e Kryqit të Kuq italian dhe ndërkombëtar dhe për Presidentin e Gjysmëhënës së Kuqe të Sirisë, respektivisht zotin Rocca dhe zotin Hboubati.

Po ashtu dua të përshëndes autoritetet diplomatike që u përfshinë në këtë operacion. Por dua të përmend një aspekt të veçantë – ishin autoritetet libaneze, të cilat mbështetën me gjithë kapacitetet e tyre realizimin e operacionit në terren.

Rasti ka marrë një vëmendje të madhe dhe automatikisht shtrohet pyetja: “Nëse ne po e përdorim politikisht këtë apo jo?” Dhe unë po them – Po! Po e përdorim politikisht për të dhënë disa mesazhe të rëndësishme, të cilat duhet të na vlejnë të gjithëve ne, për pas këtij operacioni. Alvin Berisha është një rast i trishtuar, i cili duhet të na tregojë të gjithëve që terrorizmi, radikalizmi, dhuna, ekstremizmi nuk janë opsione, të cilat mund të jetojnë në shoqërinë tonë. Dhe gjithë sfida e politikës, e shoqërisë, e autoriteteve është që raste si ky i Alvin Berishës të mos përsëriten më në shoqëritë tona dhe terrorizmi, ekstremizmi, radikalizmi, çdo formë e dhunës, të mos gjejë asnjë hapësirë në shoqërinë tonë europiane.

Edhe njëherë faleminderit Gjeneral Spina, faleminderit President Roka, faleminderit President Hboubati për mbështetjen dhe angazhimin tuaj të jashtëzakonshëm, që mundësuat dhe njëherë që sot një djalë i ri shqiptar dhe italian, të kthehet i lirë për të vazhduar jetën e tij në liri!

Alba Kepi, gazetare Ora News, Ora TV: Sa e rëndësishme ka qenë kjo aleancë për të arritur sot në këtë rezultat?

Ministri Lleshaj: Faleminderit për pyetjen! Në fakt ne me Italinë kemi një bashkëpunim të gjatë. Me Italinë bashkëpunojmë jo vetëm për këtë rast, por për të gjitha rastet.

Ne mund të organizojmë dhe çdo javë një konferencë të përbashkët shtypi me Italinë, për të treguar se çfarë bashkëpunimi ndodh mes dy vendeve, në fusha të tjera dhe në nivelin policor.

Ky është një rast i veçantë, i cili ka marrë një vëmendje super të veçantë publike dhe është shumë i rëndësishëm. Bashkëpunimi ynë me Italinë për këto kushte ka nisur që në momentin zero të kësaj çështjeje, pra që në ditën kur autoritetet shqiptare, ambasada shqiptare i është drejtuar zyrtarisht me një kërkesë Kryqit të Kuq ndërkombëtar dhe Gjysmëhënës së Kuqe të Sirisë për asistencë në zgjidhjen e këtij problemi shumë të rëndësishëm.

Dhe që nga ajo ditë, ka qenë data 25 tetor, deri më sot, ka vazhduar së bashku operacioni i të dy palëve. Dhe në të gjithë këto hapa kemi qenë bashkë.

Unë nuk dua të bëj diferenca se kush ka bërë çfarë, por ky ka qenë një operacion ku sikur edhe njëri nga aktorët të mos, ai nuk finalizohej me sukses. Por për fat të gjithë kanë funksionuar së bashku në mënyrë perfekte pa asnjë problem, pa asnjë vështirësi dhe u mundësua që operacioni të finalizohej me këtë sukses kaq të mirëpritur. Pra këtu s’ka mundësi të bëj diferencim mes aktorëve.

Faleminderit!