Ministri Lleshaj i ftuar në emisionin 'Real Story" - Ministria e Brendshme
Postuar më: 20/12/2018

Ministri Lleshaj i ftuar në emisionin ‘Real Story”

Ministri i Brendshëm Sandër Lleshaj ishte i ftuar në emisionin ‘Real Story” në Vizion Plus, me gazetarin Sokol Balla – VIDEO

Ministri i Brendshëm Sandër Lleshaj në emisionin “Real Story”:

Sokol Balla: Mirëmbrëma dhe mirë se vini në “Real Story”. Dekretimi dhe fillimi i tij i punës shkaktoi një furtunë të vërtet politike në Shqipëri dhe ndoshta përplasjen më të madhe institucionale, po gati dhe kushtetuese në vend në 28 vitet e fundit. Por nga momenti i dekretimit dhe deri në momentin kur ai mori detyrën Sandër Lleshajt, i është dashur të përballet me situata nga më të vështirat. Unë kam kënaqësinë të kem sot në studio, ministrin e Punëve të Brendshme, zotin Lleshaj. Mirëmbrëma dhe faleminderit që jeni me mua sonte..

Ministri Lleshaj: Faleminderit! Mirëmbrëma!

Sokol Balla: Pa dyshim kam shumë gjëra për të cilat dua t’ju pyes, le të themi dhe për të shkuarën, po vërtet gjatë periudhës që ju keni marrë detyrën kanë ndodhur ngjarje vërtet të rëndësishme. Unë do doja ta nisja zoti ministër me përjashtimin ose përzënien nga Shqipëria ta themi kështu, të një ambasadori të huaj, bëhet fjalë për ambasadorin e Republikës Islamike të Iranit dhe një prej drejtuesve me sa kuptojmë ne, akoma nuk e kemi të konfirmuar apo jo, të një nga drejtuesit e shërbimeve sekrete apo të sigurisë, të atashuar pranë ambasadës. Shteti shqiptar sot, qeveria juaj mori një urim të drejtpërdrejtë edhe nga Donald Tramp, Presidenti i Shteteve të Bashkuara të Amerikës, por ndërkohë që një ditë më herët e përshëndetën këtë fillimisht Jon Bolton, Këshilltari i Sigurisë Kombëtare i Presidentit dhe më pas Mike Pompeo, të cilët nuk kursyen lëvdatat për rreshtimin e Shqipërisë përkrah SHBA në këtë qëndrim, në ashpërsim e sipër, pra ndaj regjimit të mullahëve në Teheran, por si qëndron e vërteta e përzënies së këtij ambasadori, që jo vetëm në këto 30 vite, por sa mund të kujtoj unë ndoshta është hera e parë që shteti shqiptar largon nga Shqipëria një kryediplomat.

Ministri Lleshaj: Lajmi është bërë ditur tashmë dhe dihet botërisht që ka ndodhur një dëbim i dy diplomatëve të ambasadës së Iranit për arsye që janë bërë po ashtu publike, arsye të sigurisë kombëtare. Fakti që ky vendim, ky lajm ka marrë vëmendje të madhe, ju përmendët që nga Presidenti Tramp apo Sekretari i Shtetit Pompeo, apo Këshilltari Sigurisë Kombëtarë Bolton, do të thotë që bëhet fjalë për një vendim të rëndësishëm që ka marrë qeveria Shqiptare, në shërbim të interesave të sigurisë kombëtare të këtij vendi. Ju e dini që ne kemi marrë përsipër të pranojmë në Shqipëri një numër të konsiderueshëm qytetarë të Iranianit që kanë qenë në rrezik imediat për jetën e tyre, për sa kohë ishin në Iran dhe Shqipëria i ka pranuar këta qytetarë Iranian për qëllime humanitare, në mënyrë që t’u ofrojë strehë dhe siguri, por dihet që këta qytetar Iranian janë dhe pjesë e Rezistencës Iraniane dhe ky fakt ka sjellë që një pjesë e problematikës midis Rezistencës Iraniane dhe qeverisë së Iranit të spostohet në Shqipëri. Domethënë janë shtuar dhe risqe të caktuara që ky tension, ky konflikt midis këtyre dy palëve, të transferohet në një farë mënyre këtu, me qëllim që ky rrezik të mos ekzistojë më në Shqipëri, që ky konflikt ndër-iranian mos të jetë dhe një konflikt i mbartur në Shqipëri, qeveria Shqiptare ka marë vendimin për të cilin ju dhe publiku i gjerë është njohur.

Sokol Balla: E thënë kështu, përkthimi i thjesht i kësaj është që ambasadori i Iranit ishte le të themi përgjegjësi kryesor për rritjen potenciale të rreziqeve të këtyre përplasjeve, deri sa ju si qeveri keni arritur tek pikat që të përzini Ambasadorin, kjo do të thotë që nuk bëhet fjalë thjesht për çështje vlerësimi, bëhet fjalë për fakte apo jo? Pra bëhet fjalë për përpjekje reale për të organizuar incidente përplasje, sulme, akte terroriste apo jo?

Ministri Lleshaj: Sigurisht që gjithçka e mirë që vjen nga ambasadat apo dhe e keqe lidhet me ambasadorin, i cili është titullari i çdo misioni diplomatik. Në rastin konkret ambasadori është pjesë e rëndësishme e gjithë shqetësimit që ka patur qeveria Shqiptare dhe partnerët tanë ndërkombëtar. Ju lutem, që duhet të keni mirëkuptim, përderisa flasim për çështje të sigurisë kombëtare atëherë unë nuk kam mundësi të ekspozojë fakte, të cilat mund të ngjallin kureshtje por bëjnë dëm.

Sokol Balla: Jo patjetër, por kjo do të thotë që procesi hetimor është në vijim?

Ministri Lleshaj: Sigurisht që asnjë veprim i një qeverie të përgjegjshme, siç është Qeveria e Shqipërisë, nuk mund të bazohet as në opinione, as në pandehma, por është i bazuar në evidencë të qartë, me të cilën lidheshin rreziqe potenciale për sigurinë e vendit.

Sokol Balla: Pra jo thjesht me MEK-ët, pra nuk bëhet fjalë thjesht për aksione të planifikuara thjesht kundër MEK-ve, por dhe ndaj Sigurisë Kombëtare të shtetasve shqiptar apo jo?

Ministri Lleshaj: Përderisa MEK-ët janë këtu ata janë pjesë e përgjegjësisë tonë, janë nën mburojën dhe nën përgjegjësinë tonë të sigurisë. Sigurisht që ardhja e tyre në Shqipëri paraqet një risk, për arsye se ata kanë qenë dhe vijojnë të jenë të kërcënuar dhe këtu ka fakte botërisht të njohura.

Sokol Balla: Ndjesë se insistoj t’ju pyes, unë ju mirëkuptoj në përgjigjet tuaja të rezervuara, por më mirëkuptoni dhe mua në pyetjet e mia. Personi dytë, diplomati i dytë, bëhet fjalë për dikë të cilin ka ende dilema, së paku deri tani, është vërtet një person që lidhet me shërbimet sekrete Iraniane, pra që punon për ta nën petkun e diplomatit, këtu në Tiranë?

Ministri Lleshaj: Unë mund t’ju them vetëm kaq që me vendimin e marrë qeveria shqiptare ka kontribuar që siguria e vendit të jetë më e mirë sot se dje.

Sokol Balla: Pse le të themi, pra duhet të ketë qenë shumë e rëndësishme përderisa solli një reagim kaq të jashtëzakonshëm edhe nga Presidenti amerikan?

Ministri Lleshaj: Në qoftë se keni ndjekur me vëmendje zhvillimet e fundit në Evropë keni pasur evidence të tilla të ngjashme dhe në vendet e tjera të Evropës, ku anëtarët e organizatës MEK kanë qenë të kërcënuar nga shërbimet e sigurisë së Iranit.

Sokol Balla: Unë kam qenë në Paris zoti Ministër këtë vit, dhe ai eveniment ku ishte dhe liderja e tyre Razhavi, u kërcënua që do të sulmohej, në mos gaboj dy diplomat Iranian në Austri u arrestuan. Pra ka një ndërlidhje të këtyre ngjarjeve?

Ministri Lleshaj: Nuk mund të flas për ndërlidhje mund të flas për një tipologji të ngjashme në incidente të ndryshme të ndodhura nëpër Europë, që lidhen me të njëjtin subjekt, pra me MEK-un. Pra kemi një tipologji ku anëtarë të forcave të sigurisë të kamufluar nën petk diplomatik kanë tentuar të krijojnë incidente për sigurinë e vendeve të caktuara dhe Shqipëria në kuadër të këtyre masave parandaluese dhe përkujdesje për sigurinë e vet, ka marrë atë masën që dje u bë botërisht e njohur.

Sokol Balla: Zoti Ministër a është kjo masë e vëzhgimit, e ruajtjes, e survejimit, për çështje sigurie, a është rrit kjo dhe mbi MEK-ët, le të themi një kanal prestigjioz anglez Channel Four ka publikuar një shkresë të Policisë Shqiptare pak muaji më parë që përshkruante historikun e MEK-ve, të cilët në të shkuarën e tyre kanë qënë dhe ata të dhunshëm dhe ata kanë qënë lëvizje e armatosur, pavarësisht se unë isha në kampin e tyre dhe mund t’ju konfirmoj një gjë që ju e dini më mirë se unë se ata janë thjesht një kamp refugjatësh, të qënit këtu për arsye humanitare, kundërshtojnë regjimin mes internetit, blogjeve, rrjeteve sociale, etj, pra bëjnë një oponencë virtuale, megjithatë në atë letër të Policisë Shqiptare shkruhej se rreziku potencial për shfaqjen e veprimeve të tyre të dhunshme qëndron edhe nga MEK-ët, pra ata janë sigurisht të mirëpritur nga ne, por a janë autoritetet në alert për të vëzhguar të gjithë këtë pejsazh të konfliktit ndër-iranian që u spostua në Tiranë ose në Shqipëri më saktë?

Ministri Lleshaj: Anëtarët e MEK janë pranuar në Shqipëri për arsye humanitare, për ti ofruar, mbrojte të cilën nuk e kishin në kushtet e atëhershme ku gjendeshin ata në Iran. Janë pranuar këtu pra për arsye humanitare, jo për arsye politike dhe Qeveria e Shqipërisë nuk ka pasur ndonjë axhendë e as nuk ka ndonjë axhendë politike të lidhur me ta. Janë pranuar dhe në vijim të një tradite të çmuar humane të popullit shqiptar, për të dhënë dhe për të ndarë atë çka ka me ata që kanë nevojë , kemi historinë e hebrenjve gjatë Luftës së dytë Botërore, kemi histori të tjera gjatë periudhës së mëvonshme, kemi historinë me vëllezërit tanë të Kosovës, edhe kjo është në vijimin e një tradite e cila për shqiptarët është tashmë e njohur. Ne i kemi mirëpritur si miq anëtarët e MEK, pra ne nuk i konsiderojmë risk apo kërcënim për sigurinë tonë, sepse përndryshe nuk do ti kishim pranuar në Shqipëri dhe ky është qëndrimi që ka Qeveria, Policia Shqiptare edhe autoritete të tjera të sigurisë ndaj këtyre personave, pra janë persona në nevojë që kanë nevojë për mbështetje, për mbrojtjen dhe për sigurinë që ofrojmë ne ndaj tyre. Sigurisht askush nuk mund të prezumohet as nga e mira as nga e keqja, por në thelb qëndrimi ynë ndaj tyre është krejtësisht një qëndrim krejtësisht pa asnjë lloj paragjykimi. Janë miq të mirëpritur në Shqipëri për të zhvilluar jetën e tyre, jo veprimtarinë e tyre politike.

Sokol Balla: Z.ministër që nga periudha e ndeshjeve me Izraelin, masave e rrepta të sigurisë atëherë, por edhe pak muaj më vonë u fol se aktivitetet sportive kryesisht futbolli, ishin kërcënuar nga sulme të mundshme terroriste, të cilat më pas u shmangën nga forcat e sigurisë shqiptare, shërbimet sekrete në bashkëpunim me aleatët. A qëndronte Irani pas këtyre?

Ministri Lleshaj: Mjedisi terrorist sot ndërkombëtar, dominohet nga aktorë të ndryshëm dhe nuk mund të themi se kemi vetëm një aktor të vetëm të identifikuar, sigurisht qeveria e Iranit njihet si një qeveri që e sponsorizon prej vitesh terrorizmin, por jo vetëm, kemi patur dhe vazhdojmë të kemi ndonëse në grahmat e fundit ISIS-in dhe organizata të tjera terroriste, që veprojnë në pjesë të ndryshme të Globit dhe nuk mund t’i vëmë emër. Prapë iu kërkojmë mirëkuptim për çështje të sigurisë kombëtare, të cilat nuk kanë përfunduar ndonjëherë në ndonjë Gjykatë, nuk mund të jepen të dhëna të tjera të asnjë lloji ,për arsye se dëmtojnë. E duam këtë mirëkuptim me gjithë kërshërinë gazetareske.

Sokol Balla: Patjetër, unë tek kjo pika e tërheq kërshërinë aq më tepër për çështje që janë nën hetim akoma dhe ndoshta mund të ketë edhe rezultate të tjera, apo jo? Pra priten veprime të tjera në këtë proces, se ky është proces hetimor që besoj duhet të jetë duke vazhduar apo jo?

Ministri Lleshaj: Nuk bëhet fjalë për proces hetimor më shumë se sa për një proces përkujdesje për sigurinë në vijueshmëri dhe përkujdesja ndaj sigurisë, na kërkon që të jemi shumë të kujdesshëm me detajet.

Sokol Balla: Z. ministër a është Shqipëria e përgatitur për të përballuar situata të tilla? Pasi unë pak a shumë kam lexuar, e njoh edhe tipologjinë e lëvizjeve terroriste, derisa nuk ndodhën ngjarjet e Londrës për shembull, gjithmonë flitej se terroristët nuk para sulmojnë vende ku shumica është myslimane apo nuk godasin vende që ju japin strehë familjeve të tyre dhe ne e dimë shumë mirë nga historiku që shumë nga terroristët apo liderët terroristë botërorë për shembull në Angli kanë strehuar familjet e tyre kanë pasur asetet e tyre, pronat e tyre dhe Anglia deri diku ishte e mbrojtur. Pas ngjarjeve të Korrikut të 2007 në mos gaboj, edhe kjo teori ra. Pra në njëfarë mënyre edhe vende me shumicë myslimane, dhe pastaj ndodhën akte terroriste, edhe në këto vende kanë ndodhur akte të tilla. Pra a është Shqipëria e përgatitur për të përballuar situata të tilla?

Ministri Lleshaj: Unë së pari, nuk besoj që terroristët kanë etikë dhe ndjekin ndonjë kod etik të caktuar për të mbrojtur këtë.

Sokol Balla: Nuk është etikë ajo është çështje praktike më tepër që kur ti godet myslimanët sigurisht që shkakton viktima mes tyre…

Ministri Lleshaj: Nuk e kanë kursyer dorën as ndaj myslimanëve. Shpeshherë është goditur Turqia ose çfarë ndodhi në Lindjen e Mesme në Siri, në Libi, se sa mijëra e mijëra myslimanë janë viktimizuar prej akteve terroriste do të arrijmë në përfundimin e qartë që në kuadrin e kësaj vale terrorizmi që ka pushtuar kontinentin ose rajonin prej dekadash tashmë viktimat më të shumta kanë qenë vetë myslimanët. Kjo është e vërtetuar si fakt që viktimat më të shumta kanë qenë myslimanët, por për të ardhur tek pyetja juaj a jeni të përgatitur, sigurisht që ne bëjmë maksimalen e mundësive tona. Parandalim absolut ndaj goditjeve nuk ka askush, Ju i shihni në mënyrë frekuente se çfarë ndodh në vende me kapacitete shumë herë më të mëdha dhe me struktura shumë herë më të ndërlikuara sesa tona, të cilat janë goditur. Megjithatë unë do të them se Shqipëria ka arritur që të parandalojë disa goditje serioze, e cila na jep arsye për të besuar në kapacitetet tona dhe unë besoj fort se kapacitetet tona janë së pari vigjilente në maksimumin e tyre;së dyti janë të përgatitura dhe të motivuara për të bërë detyrën më së miri.

Sokol Balla: Pra, ka patur përpjekje serioze?

Ministri Lleshaj: Patjetër që ka patur përpjekje serioze, të cilat nuk kanë funksionuar fal reagimit parandalues që kemi patur ne, strukturat tona në bashkëpunim edhe me partnerët tanë.

Sokol Balla: Ta zgjeroj pak pyetjen, a është e përgatitur Shqipëria për të përballuar valë destabiliteti që vijnë nga jashtë, pra se destabiliteti është pak më ndryshe se një akt terrorist i cili është një goditje, kurse destabiliteti bëhet fjalë për një fushatë më të strukturuar dhe me të organizuar që ka më shumë para, përfshin shumë njerëz dhe shtrihet më shumë në kohë.

Ministri Lleshaj: Destabiliteti është i shumëllojshëm. Në qoftë se do ta përjashtojmë këtë çështjen e terrorizmit, së cilës u mundova t’i jepja një përgjigje aq sa mund ti jepet në situata të këtij diskutimi valët e tjera apo llojet e tjera të destabilitetit, kërkojnë përgjigje të ndryshme. Sigurisht që Rajoni i është nënshtruar përpjekjeve dhe ende është një lloj targeti për destabilitet, për sa kohë e ardhmja e Rajonit nuk është e mbyllur përfundimisht në kuptimin politik, interesat dhe shpresat e aktorëve të tretë për ta destabilizuar vazhdojnë të persistojnë, për arsye se ky Rajon prej shekujsh është në pikë takimin e interesave të ndryshme të aktorëve të mëdhenj, të cilët duke ndjekur interesa të ndryshme strategjike, kanë çuar në atë që Rajoni ka mbetur përherë i pa stabilizuar. Për fatin tonë të mirë një ndër dy pyetjet më të mëdha të së ardhmes sonë është zgjidhur me hyrjen e Shqipërisë në NATO, gjë e cila ka përjashtuar mundësinë e një destabiliteti të rëndë për sigurinë kombëtare dhe integritetin e vendit. Kjo është e përjashtuar që ditën që ne kemi nënshkruar “Traktatin e Atlantikut” dhe çdo përpjekje e kujtdo është një përpjekje iluzore dhe naive për të shkaktuar trazira ose destabilitet në Shqipëri. Në Shqipëri mund të shkaktohen gjëra të një shkalle tjetër, por destabilitet të përmasave të mëdha është i pamundur, i përjashtuar që në momentin që kemi hyrë në NATO. Fakti që thashë tashmë po synojmë të afrohemi edhe me BE, do t’i zgjidhë përfundimisht të gjitha pikëpyetjet lidhur me të ardhmen e vendit tonë.

Sokol Balla: Ka patur disa shkrime në shtypin e huaj, të cilët kanë lidhur këto situatat e fundit protestat në Ballkan, përfshirë Shqipërinë, tashmë edhe në Maqedoni dhe disa artikuj nuk kanë ngurruar të flasë as shtypi i huaj ka dhe dorë të shërbimeve të huaja, kryesisht lindore, pra rusët le ta themi ndryshe.

Ministri Lleshaj: Unë ju thashë, se për sa kohë rajoni është një mjedis gjeopolitik me të ardhme të pazgjidhur përfundimisht, për arsye se ne kemi disa vende edhe të rajonit të cilat ende nuk e kanë zgjidhur në mënyrë strategjike të ardhmen e tyre, si p.sh Maqedonia është e pambyllur çështja, Kosova ka ende pikëpyetje të pazgjidhura, Bosnjë-Hercegovina, Serbia, Mali i Zi pothuajse është zgjidhur tashmë.

Sokol Balla: Por nuk kanë munguar edhe aty pak vite më parë, përpjekjet serioze për ta destabilizuar vendin.

Ministri Lleshaj: Ishim në kuadër të përpjekjes për të penguar pikërisht orientimin e madh strategjik që ndodhi dhe përsa kohë janë këto vatra ende të pazgjidhur në pikëpamjen gjeopolitike interesat për të mbajtur gjallë konflikte, janë të pranishme më shumë në periferinë tonë se sa tek ne. Por sigurisht askush nuk përjashton mundësinë e interferencave të aktorëve të tretë, kjo është e njohur.

Sokol Balla: Në fakt ju kujtoj ditën që ju morët detyrën zyrtarisht, pati goxha ngjarje ndodhi arratisja e ish-Kryeministrit Gruevski, në një situatë që besoj meriton një sqarim në pikën se sa në dijeni kanë qenë autoritetet për atë që ndodhi? Pra zotëria kaloi kufirin e gjelbër apo jo? Më pas me gjasë sipas informacioneve të deritanishme janë që ai ka fjetur një natë në ambasadën e Hungarisë në Tiranë. Më pas është përcjellë me makinë me targa diplomatike drejt kufirit me Malin e Zi dhe më pas ka kaluar nga Serbia dhe më pas në Hungari ku tashmë gëzon një liri të plotë në kushtet e azilit politik. Sa në dijeni kanë qenë autoritetet shqiptare të odisesë shqiptare pak orëshe të Grueskit, nëse mund të na jepni detaje.

Ministri Lleshaj: Me sa di unë, zoti Gruevski ka pasur një odise pak më të madhe se shqiptare, ka pasur një odise evropiane, ka shëtitur nëpër disa shtete të Evropës dhe më duhet të them për hir të së vërtetës se vetëm Shqipëria ishte ajo që dha të dhëna të sakta për itinerarin e tij.

Sokol Balla: Pra ju e dinit që ndaj ai u fut në Shqipëri?

Ministri Lleshaj: Jo, ne e dinim që ai doli nga Shqipëria. Po të paktën dinim një fakt për të, nuk kemi ditur hyrjen, por kemi ditur daljen dhe dalja e tij u bë shkas që opinioni publik ndërkombëtar të marrë vesh këtë itinerar, sepse edhe vendi amë i tij nuk dinte se ku ishte ish-kryeministri.

Sokol Balla: Pra se kishin fare idenë?

Ministri Lleshaj: Pra, ishte krejtësisht një situatë fare e paqartë. Shqipëria pati, unë do thosha meritën, që të paktën arriti të sqaroi një enigmë, e cila shqetësoi shumëkënd. Sigurisht që kufijtë e Shqipërisë janë kufij të hapur tashmë, falë Zotit që janë hapur…

Sokol Balla: Pra në atë moment ai nuk ka qënë i kërkuar?

Ministri Lleshaj: Jo jo, sigurisht ai ka qenë një qytetar i lirë.

Sokol Balla: Hyrja-dalja ka ndodh në datën 12 ndërkohë që mandati ndërkombëtar ka qenë në 13 me 14.

Ministri Lleshaj: Në Shqipëri ai ka lëvizur në mënyrë krejtësisht legale, dalja e tij ka qënë krejtësisht legale, aq më tepër që ka qenë një dalje nën koperturë diplomatike që edhe në rastet që do të ishte në kërkim do ta vështirësonte pak ndërhyrjen e autoriteteve tona, por ai ka kaluar në mënyrë legale. Fakti është që kufijtë tanë janë të menaxhuar në një mënyrë të tillë saqë lenë gjurmë dhe gjurma e tij u identifikua në dalje të Shqipërisë.

Sokol Balla: Pati ndopak debat me idenë që a mund të ketë një vulë dalëse një person që nuk ka një vulë hyrëse?

Ministri Lleshaj: Z. Balla ka një gjë se e nisa më herët, kufijtë tanë nuk janë kufijtë e diktaturës të cilët ishin të pakalueshëm. Sot janë kufij porozë në një farë mënyre. Pra kemi pikat e kalimit kufitar, por kemi edhe një brez të tërë të kufirit të gjelbër, i cili edhe mund të kalohet.

Sokol Balla: Jo për atë po, edhe mund të kalohet. Nuk flas për atë, ajo është normale, edhe mund të ketë kaluar, flas për daljen, jo për hyrjen.

Ministri Lleshaj: Në dalje ai ka dalë në mënyrë të rregullt.

Sokol Balla: A mund të marri për shembull një vulë dalëse dikush që nuk ka një vulë hyrëse? Pra si funksionon sistemi.

Ministri Lleshaj: Problemi është që si rregull ai duhet të identifikohet në hyrje dhe në dalje. Por nuk ka patur një evidencë në hyrje, por fakti që kemi një evidencë në dalje, do të thotë që sistemi ka qenë në funksion. Thjesht supozimi i parë është që ose s’është paraqitur në një pikë kalimi kufitar po ka gjetur një rrugë tjetër ose ka qenë jo i dukshëm në momentin e kontrollit. Ju e dini që makinat nuk hapen për të bërë kontroll të imtësishëm në pikat e kalimit kufitar nëse do të jesh në bagazh apo i fshehur diku edhe mund të kalosh.

Sokol Balla: Mund të ketë ndodhur edhe kështu?

Ministri Lleshaj: Pyetja është, përse e identifikoi sistemi ynë në dalje dhe jo në hyrje.., nëse do të kishte një komplot për ta….

Sokol Balla: Jo, jo, si është rregulli. Për shembull nëse i paraqitet policit një qytetar, dhe nuk ka vulën hyrëse, mund t’i japi polici vulën dalëse pa pasur një vulë hyrëse, pa pasur një gjurmë hyrëse në sistem? Thjesht për kuriozitet më tepër.

Ministri Lleshaj: Policia kontrollon në sistem, kontrollon emrin, nëse nuk je në një listë kërkimi, të le të kalosh pa i hyrë edhe verifikimit të çdo vule, e keni parasysh se si bëhet një pasaportë me sa vula. Nuk është ky thelbi i çështjes, thelbi i çështjes është që ai është paraqitur në dalje dhe nuk ka patur në sistem një urdhër kërkimi apo një flamur të kuq që ta kërkonte.

Sokol Balla: Po, nuk ka qënë në listën e kërkimit, nuk është ndez alarmi i kuq.

Ministri Lleshaj: Fakti që sistemi reagon, është lajm i mirë në një kohë që nuk kanë funksionuar sistemet e tjerë. Kemi vendin fqinj, ai vend që kishte përgjegjësinë për ta pasur në kërkim nuk e ka identifikuar. Tani ne mund ta qortojmë sa të duash edhe sistemin tonë por të paktën sistemi ynë ishte i vetmi që reagoi, që e kapi këtë.

Sokol Balla: Jo, jo, unë nuk po qortoj, thjesht po bëj pyetje për ta sqaruar se ka pasur një debat më tepër për çështjen e vulës hyrëse dhe vulës dalëse, a duhet të ishte ndaluar një person që nuk kishte vulën hyrëse por ju e sqaruat këtë. Është e vërtetë që ai ka fjetur në Tiranë 24 orë?

Ministri Lleshaj: Këtë nuk mund ta them, s’e di dhe s’kemi kërkuar për këtë gjë.

Sokol Balla: Zoti Ministër, ju morët kur ishit akoma zv/ministër në pritje të dekretit të Presidentit, morët masa shumë të forta në kufi për grekët që vinin në një nga këto ceremonitë e Kacifas. Me thënë të vërtetën, shumë shqiptarë, u përkthyen si një shenjë dinjitoze e shtetit, pra që nuk lejoi atë që ndodhi herën e parë, të themi deri diku sjelljet jo të hijshme të shtetasve grek ditën e varrimit të të ndjerit Kacifas. Megjithatë debati vazhdon, grekët vazhdojnë dhe akuzojnë. Çfarë po ndodh për hetimet e ngjarjes, më saktë rrethanave të vrasjes së tij nga forcat RENEA.

Ministri Lleshaj: Po hetimet zhvillohen nga Prokuroria dhe momenti që këtë proces e ka marrë Prokuroria, strukturat e Ministrisë së Brendshme nuk kanë rol në çështje dhe në përgjithësi për çështjet hetimor nuk merren, janë jashtë përgjegjësisë, por edhe jashtë interesit tim për tu marrë me çështje konkrete. Sigurisht që rasti na ka shqetësuar, sepse ishte një rast që tensionoi pa shkak pa arsye marrëdhëniet midis dy vendeve. Ka ndodhur një incident, ne nuk e dimë akoma se çfarë ka ndodhur se pa patur një përgjigje shteruese nga organet e hetimit ne nuk mund të themi se çfarë ka qenë. Dimë që ka patur një incident; ka patur një konflikt; pra kemi patur një shkëmbim zjarri midis një qytetari shqiptar edhe grek, me policinë shqiptare. Në përfundim të këtij shkëmbimi zjarri është konstatuar i vdekur shtetasi në fjalë. Kaq dimë deri tani dhe asnjë rrethanë tjetër, nuk mund të spekulojmë pa patur përfundime të qarta se çfarë ishte. Problemi ishte pasojë, ka lidhje me faktin që patëm një situatë disi të pazakontë me keqpërdorimin e një morti për ta shndërruar një mort në një koncert nacionalizmi demode, i cili nuk i bën hije kurrkujt në fakt.

Sigurisht që autoritetet tona, strukturat tona, në respekt të kodit tonë dhe kodit të çdo populli për vdekjen, mbajtën atë qëndrim që mbajtën për të cilin janë kritikuar nga rrethe të caktuara brenda vendit tonë. Megjithatë unë mendoj që ishte qëndrimi i duhur për arsye se bëhej fjalë për respektimin e një morti dhe në kodet e çdo populli, edhe ushtarët armiq të vrarë në momentin që vriten, pushojnë së qënuri armik dhe kthehen në të vdekur. I vdekuri i ka marrë të gjitha me vete dhe nuk ka të vdekur të keq dhe armik. Pra qëndrimi ynë ishte i bazuar në këtë kod të lashtë sa vet njerëzimi. Ndërsa sigurisht në përpjekjen e dytë…

Sokol Balla: Në të dyzetat apo jo, mbajtën qëndrim krejt tjetër, patët sinjalizime serioze që diçka mund të ndodhte?

Ministri Lleshaj: Sigurisht që ne kishim sinjalizime edhe në rastin e parë që mund të kishte keqpërdorim dhe shfaqe nacionaliste të shëmtuara dhe demode dhe që nuk na shërbejnë fare në marrëdhëniet midis dy vendeve tona.

Sokol Balla: Po në rastin e të dyzetave kishit sinjalizime për shqetësime të çështjeve të sigurisë apo?

Ministri Lleshaj: Në rastin e të dyzetave ishin shqetësime të ngjashme me ato të parat, ndoshta edhe të tjera, ne morëm ata masa që çdo shtet normal duhet të marri për të mos lejuar që të shndërrohet në ngjarje të kësaj natyre, në incidente të cilat kontribuojnë për të krijuar një klimë të papërshtatshme midis dy popujve, të cilët kanë marrëdhënie shumë të mira, kanë në mes 2 elementë që i lidhin, pra qoftë minoriteti grek në Shqipëri, qoftë numri jashtëzakonisht i madh i shqiptarëve në Greqi, janë elementë aq të rëndësishëm saqë i bëjnë konfliktet mes 2 vendeve jo vetëm të panevojshme, por edhe absurde dhe në fakt edhe të pamundura. Kështu që ne nuk mund të lejojmë që koka të nxehta, nga cilido krahë qoftë, të shkaktojnë, të keqpërdorin në emër të nacionalizmit fals dhe në emër të folklorit nacionalist të keqpërdorin momente të tilla për të hedhur benzinë në këto marrëdhënie. Dhe për këtë u morë edhe ato masa që u morën. Nuk u morën as për treguar revansh, as për të treguar forcë, por u morën për t’i shërbyer një situate të qetë e të natyrshme, e cila duhet të mbizotëroi mes marrëdhënieve tona. Ne jemi vende që po aspirojmë të bashkohemi në familjen evropiane ku është edhe Greqia dhe janë të gjithë këto faktorë që e bëjnë opsionin e përkeqësimit të marrëdhënieve me Greqinë të panevojshëm, të dëmshëm, e kushdo që kontribuon kësaj, qoftë shqiptar apo grek duhet të marrë atë përgjigje që duhet. Në këtë rast ishin shumë rrethe nacionaliste greke që u përpoqën të shfrytëzojnë situatën dhe ne u dhamë të vetmen përgjigje që mund t’u jepej.

Sokol Balla: Pati dhe 2-3 vrasje të shqipëruarve në Greqi të themi në këto 40 -50 ditë, le të themi keni komunikim me palën greke, ka një shqetësim, një tendencë drejtë normalitetit të raporteve të dyjave anët të kufirit ?

Ministri Lleshaj: Unë mund të them që autoritetet greke , qeveria greke është krejtësisht bashkëpunuese dhe krejtësisht e kthjellët për rëndësinë e mbajtjes së marrëdhënieve në nivel normal dhe për rëndësinë e izolimit të çdo koke të nxehtë, të cilët përpiqen për interesat krejt të vogla, qoftë andej edhe këtu tek –tuk për të shkaktuar problemet. Rastet e ngjarjeve me qytetarë shqiptar në Greqi sigurisht që përbën një shqetësim të madh për neve pavarësisht se çfarë përfaqësojnë, qofshin persona me rekorde kriminale, qofshin persona të kapur me drogë e tjera me radhë për ne është një shqetësim i madh dhe ne kemi prezantuar pranë autoriteteve greke.. .

Sokol Balla: Rasti i Konfuzit është rast flagrant

Ministri Lleshaj: Rast flagrant, një nacionalizëm i verbër dhe i pabesë, i cili ka gjetur një përgjigje të fortë të qeverisë Shqiptare, ju keni ndjekur reagimet zyrtare të Ministrisë së Punëve të Jashtme, të Kryeministrit, në kanale të tjera, por edhe në rastet e tjera ne i konsiderojmë shqiptarët objekt përgjegjësie të shtetit Shqiptar, qofshin edhe ato që kanë probleme. Ishte një rast tjetër që ishte me kanabis e të tjera me radhë , vrasja sigurisht që meriton vëmendje, meriton investigim për arsye se dënim me vdekje është hequr për çdo lloj krimi në Evropë, pra nuk duhet të ketë dënim me vdekje për asgjë.

Sokol Balla: Po ekziston edhe pala shqiptare të hetojë, të jetë pjesë e këtyre hetimeve?

Ministri Lleshaj: Jo, pjesë e hetimeve nuk mund të jemi ne, ashtu si kundër pala greke nuk mund të jetë dhe nuk është pjesë e hetimeve tona në rastin Kacifas. Ne besojmë te autoritetet greke dhe u kërkojmë atyre dhe insistojmë pranë tyre të bëjnë hetime të thella, serioze, ashtu siç presim që pala greke të besojë tek hetimet tona dhe të respektojmë reciprocitetin dhe sovranitetin e vendeve përkatëse (E plotë)